zindagani jawedani bhi nahin

zindagānī jāvedānī bhī nahīñ

lekin is kā koī saanī bhī nahīñ

hai savā-neze pe sūraj kā alam

tere ġham kī sā.ebānī bhī nahīñ

manzileñ hī manzileñ haiñ har taraf

rāste kī ik nishānī bhī nahīñ

aa.ine kī aañkh meñ ab ke baras

koī aks-e-mehrbānī bhī nahīñ

aañkh bhī apnī sarāb-ālūd hai

aur is dariyā meñ paanī bhī nahīñ

juz tahayyur gard-bād-e-zīst meñ

koī manzar ġhair-fānī bhī nahīñ

dard ko dilkash banā.eñ kis tarah

dāstān-e-ġham kahānī bhī nahīñ

yuuñ luTā hai gulshan-e-vahm-o-gumāñ

koī ḳhār-e-bad-gumānī bhī nahīñ

zindagani jawedani bhi nahin

lekin is ka koi sani bhi nahin

hai sawa-neze pe suraj ka alam

tere gham ki saebani bhi nahin

manzilen hi manzilen hain har taraf

raste ki ek nishani bhi nahin

aaine ki aankh mein ab ke baras

koi aks-e-mehrbani bhi nahin

aankh bhi apni sarab-alud hai

aur is dariya mein pani bhi nahin

juz tahayyur gard-baad-e-zist mein

koi manzar ghair-fani bhi nahin

dard ko dilkash banaen kis tarah

dastan-e-gham kahani bhi nahin

yun luTa hai gulshan-e-wahm-o-guman

koi KHar-e-bad-gumani bhi nahin