zer-e-mehrab na baala-e-makan bolti hai

zer-e-mehrāb na bālā-e-makāñ boltī hai

ḳhāmushī aa ke sar-e-ḳhalvat-e-jāñ boltī hai

ye mirā vahm hai yā mujh ko bulāte haiñ vo log

kaan bajte haiñ ki mauj-e-guzarāñ boltī hai

lo savāl-e-dahan-e-basta kā aatā hai javāb

tiir sargoshiyāñ karte haiñ kamāñ boltī hai

ek maiñ huuñ ki is āshob-e-navā meñ chup huuñ

varna duniyā mire zaḳhmoñ kī zabāñ boltī hai

hū kā aalam hai giraftāroñ kī ābādī meñ

ham to sunte the ki zanjīr-e-girāñ boltī hai

dard ke baab meñ timsāl-garī hai ḳhāmosh

ban bhī jaatī hai to tasvīr kahāñ boltī hai

zer-e-mehrab na baala-e-makan bolti hai

KHamushi aa ke sar-e-KHalwat-e-jaan bolti hai

ye mera wahm hai ya mujh ko bulate hain wo log

kan bajte hain ki mauj-e-guzaran bolti hai

lo sawal-e-dahan-e-basta ka aata hai jawab

tir sargoshiyan karte hain kaman bolti hai

ek main hun ki is aashob-e-nawa mein chup hun

warna duniya mere zaKHmon ki zaban bolti hai

hu ka aalam hai giraftaron ki aabaadi mein

hum to sunte the ki zanjir-e-giran bolti hai

dard ke bab mein timsal-gari hai KHamosh

ban bhi jati hai to taswir kahan bolti hai