zamin par hi rahe aasman ke hote hue

zamīn par hī rahe āsmāñ ke hote hue

kahīñ na ghar se ga.e kārvāñ ke hote hue

maiñ kis kā naam na luuñ aur naam luuñ kis kā

hazāroñ phuul khile the ḳhizāñ ke hote hue

badan ki jaise havāoñ kī zad meñ koī charāġh

ye apnā haal thā ik mehrbāñ ke hote hue

hameñ ḳhabar hai koī ham-safar na thā phir bhī

yaqīñ kī manzileñ tai kiiñ gumāñ ke hote hue

vo be-niyāz haiñ ham mustaqil kahīñ na ruke

kisī ke naqsh-e-qadam āstāñ ke hote hue

har ek raḳht-e-safar ko uThā.e phirtā thā

koī makīñ na kahīñ thā makāñ ke hote hue

ye sāneha bhī mire āñsuoñ pe guzrā hai

nigāh boltī thī tarjumāñ ke hote hue

hidāyatoñ kā hai mohtāj nāma-bar kī tarah

faqīh-e-shahr tilism-e-bayāñ ke hote hue

ajiib nuur se rishta thā nuur kā aḳhtar

ka.ī charāġh jale kahkashāñ ke hote hue

zamin par hi rahe aasman ke hote hue

kahin na ghar se gae karwan ke hote hue

main kis ka nam na lun aur nam lun kis ka

hazaron phul khile the KHizan ke hote hue

badan ki jaise hawaon ki zad mein koi charagh

ye apna haal tha ek mehrban ke hote hue

hamein KHabar hai koi ham-safar na tha phir bhi

yaqin ki manzilen tai kin guman ke hote hue

wo be-niyaz hain hum mustaqil kahin na ruke

kisi ke naqsh-e-qadam aastan ke hote hue

har ek raKHt-e-safar ko uThae phirta tha

koi makin na kahin tha makan ke hote hue

ye saneha bhi mere aansuon pe guzra hai

nigah bolti thi tarjuman ke hote hue

hidayaton ka hai mohtaj nama-bar ki tarah

faqih-e-shahr tilism-e-bayan ke hote hue

ajib nur se rishta tha nur ka aKHtar

kai charagh jale kahkashan ke hote hue