zamin jab bhi hui karbala hamare liye

zamīn jab bhī huī karbalā hamāre liye

to āsmān se utrā ḳhudā hamāre liye

unheñ ġhurūr ki rakhte haiñ tāqat o kasrat

hameñ ye naaz bahut hai ḳhudā hamāre liye

tumhāre naam pe jis aag meñ jalā.e ga.e

vo aag phuul hai vo kīmiyā hamāre liye

bas ek lau meñ usī lau ke gird ghūmte haiñ

jalā rakhā hai jo us ne diyā hamāre liye

vo jis pe raat sitāre liye utartī hai

vo ek shaḳhs duā hī duā hamāre liye

vo nuur nuur damaktā huā sā ik chehrā

vo ā.inoñ meñ hayā hī hayā hamāre liye

darūd paḌhte hue us kī diid ko nikleñ

to sub.h phuul bichhā.e sabā hamāre liye

ajiib kaifiyat-e-jazb-o-hāl rakhtī hai

tumhāre shahr kī āb-o-havā hamāre liye

diye jalā.e hue saath saath rahtī hai

tumhārī yaad tumhārī duā hamāre liye

zamīn hai na zamāñ niiñd hai na be-dārī

vo chhāñv chhāñv sā ik silsila hamāre liye

suḳhan-varoñ meñ kahīñ ek ham bhī the lekin

suḳhan kā aur hī thā zā.iqa hamāre liye

zamin jab bhi hui karbala hamare liye

to aasman se utra KHuda hamare liye

unhen ghurur ki rakhte hain taqat o kasrat

hamein ye naz bahut hai KHuda hamare liye

tumhaare nam pe jis aag mein jalae gae

wo aag phul hai wo kimiya hamare liye

bas ek lau mein usi lau ke gird ghumte hain

jala rakha hai jo us ne diya hamare liye

wo jis pe raat sitare liye utarti hai

wo ek shaKHs dua hi dua hamare liye

wo nur nur damakta hua sa ek chehra

wo aainon mein haya hi haya hamare liye

darud paDhte hue us ki did ko niklen

to subh phul bichhae saba hamare liye

ajib kaifiyat-e-jazb-o-haal rakhti hai

tumhaare shahr ki aab-o-hawa hamare liye

diye jalae hue sath sath rahti hai

tumhaari yaad tumhaari dua hamare liye

zamin hai na zaman nind hai na be-dari

wo chhanw chhanw sa ek silsila hamare liye

suKHan-waron mein kahin ek hum bhi the lekin

suKHan ka aur hi tha zaiqa hamare liye