zahr in ke hain mere dekhe hue bhaale hue

zahr in ke haiñ mire dekhe hue bhāle hue

ye to sab apne haiñ zer-e-āstīñ paale hue

un ke bhī mausam haiñ un ke bhī nikal ā.eñge Dañk

be-zarar se ab jo baiThe haiñ sipar Daale hue

chaak sī kar jo hare mausam meñ iThlāte phire

ḳhushk-sālī meñ vo tere chāhne vaale hue

baḌh ke jo manzar dikhāte the kabhī sailāb kā

ghaT ke vo dariyā zamīñ par reñgte naale hue

kaise kaise nā-gahānī hādse likkhe ga.e

yaad ke pahle varaq kis kis tarah kaale hue

kuchh udāsī ban ke phaile us ke ruḳhsāroñ ke gird

kuchh siyah bādal ke TukḌe chāñd ke haale hue

pahle ro lete the ab galiyoñ ke pheroñ kā hai shaġhl

pahle jo aañsū the ab vo paañv ke chhāle hue

chhalkī har mauj-e-badan se husn kī dariyā-dilī

bul-havas kam-zarf do chullū meñ matvāle hue

khul ga.e to bū-e-ma.anī har taraf uḌtī phirī

band ho kar lafz 'bāqar' nutq par taale hue

zahr in ke hain mere dekhe hue bhaale hue

ye to sab apne hain zer-e-astin pale hue

un ke bhi mausam hain un ke bhi nikal aaenge Dank

be-zarar se ab jo baiThe hain sipar Dale hue

chaak si kar jo hare mausam mein iThlate phire

KHushk-sali mein wo tere chahne wale hue

baDh ke jo manzar dikhate the kabhi sailab ka

ghaT ke wo dariya zamin par rengte nale hue

kaise kaise na-gahani hadse likkhe gae

yaad ke pahle waraq kis kis tarah kale hue

kuchh udasi ban ke phaile us ke ruKHsaron ke gird

kuchh siyah baadal ke TukDe chand ke haale hue

pahle ro lete the ab galiyon ke pheron ka hai shaghl

pahle jo aansu the ab wo panw ke chhaale hue

chhalki har mauj-e-badan se husn ki dariya-dili

bul-hawas kam-zarf do chullu mein matwale hue

khul gae to bu-e-mani har taraf uDti phiri

band ho kar lafz 'baqar' nutq par tale hue