zabt-e-nala se aaj kaam liya

zabt-e-nāla se aaj kaam liyā

girtī bijlī ko maiñ ne thaam liyā

pā-e-sāqī pe tauba loT ga.ī

haath meñ is adā se jaam liyā

phuul kā jaam jab girā koī

ham ne palkoñ se baḌh ke thaam liyā

āfrīñ tujh ko hasrat-e-dīdār

chashm-e-tar se zabāñ kā kaam liyā

dil jigar nazr kar diye mai ke

de ke do shīshe ek jaam liyā

ulTī ik haath se naqāb un kī

ek se apne dil ko thaam liyā

tark-e-mai kī huī talāfī yuuñ

naam saaqī kā sub.h o shaam liyā

aa ga.ī kyā kisī kī yaad 'jalīl'

chalte chalte jigar ko thaam liyā

zabt-e-nala se aaj kaam liya

girti bijli ko main ne tham liya

pa-e-saqi pe tauba loT gai

hath mein is ada se jam liya

phul ka jam jab gira koi

hum ne palkon se baDh ke tham liya

aafrin tujh ko hasrat-e-didar

chashm-e-tar se zaban ka kaam liya

dil jigar nazr kar diye mai ke

de ke do shishe ek jam liya

ulTi ek hath se naqab un ki

ek se apne dil ko tham liya

tark-e-mai ki hui talafi yun

nam saqi ka subh o sham liya

aa gai kya kisi ki yaad 'jalil'

chalte chalte jigar ko tham liya