zalim buton se aankh lagai na jaegi

zālim butoñ se aañkh lagā.ī na jā.egī

patthar kī choT dil se uThā.ī na jā.egī

hone do ho rahe haiñ jo ulfat ke tazkire

bigḌoge tum to baat banā.ī na jā.egī

kah do ye sham.a se ki abas tū hai ashk-bār

paanī se dil kī aag bujhā.ī na jā.egī

chilman ho yā naqāb ho yā parda-e-hayā

sūrat tirī kisī se chhupā.ī na jā.egī

mumkin hai tīr-e-nāz se dil ko bachā bhī luuñ

lekin nazar kī choT bachā.ī na jā.egī

āñkheñ ḳhudā ne dī haiñ to dekheñge husn-e-yār

kab tak naqāb ruḳh se uThā.ī na jā.egī

tauba ko muñh lagā ke ḳhajil hoge tum 'jalīl'

jaam o subū se aañkh milā.ī na jā.egī

zalim buton se aankh lagai na jaegi

patthar ki choT dil se uThai na jaegi

hone do ho rahe hain jo ulfat ke tazkire

bigDoge tum to baat banai na jaegi

kah do ye shama se ki abas tu hai ashk-bar

pani se dil ki aag bujhai na jaegi

chilman ho ya naqab ho ya parda-e-haya

surat teri kisi se chhupai na jaegi

mumkin hai tir-e-naz se dil ko bacha bhi lun

lekin nazar ki choT bachai na jaegi

aankhen KHuda ne di hain to dekhenge husn-e-yar

kab tak naqab ruKH se uThai na jaegi

tauba ko munh laga ke KHajil hoge tum 'jalil'

jam o subu se aankh milai na jaegi