yun ganwata hai koi jaan-e-aziz

yuuñ gañvātā hai koī jān-e-azīz

zindagī hotī to ham rakhte aziiz

kyā batā.eñ ab bikhar jaane ke ba.ad

āshiyāñ thā yā hameñ tinke aziiz

DhūñDhtā hai aaj kunj-e-āfiyat

dil kabhī jis ko the hañgāme aziiz

husn thā us shahr kā āvārgī

aur hameñ the paañv ke chhāle aziiz

ye na qissa hai na andāz-e-bayāñ

ye mirā ahvāl hai yār-e-azīz

ghar meñ jī lagtā nahīñ aur shahr ke

rāste lagte nahīñ apne aziiz

is tarah kyā ai ġhubār-e-dil koī

raqs kartā hai sar-e-kū-e-azīz

saa.e haiñ jitne gurezāñ dhuup se

dhuup ko haiñ utne hī saa.e aziiz

yā ta.alluq kuchh na thā yā aap ko

ġham hamāre ho ga.e itne aziiz

sāmne aate nahīñ aur ḳhvāb meñ

muñh chhupā lete haiñ duzdān-e-azīz

aañkh hai yā sair-gāh-e-roz-o-shab

vaqt hai yā jāda-e-umr-e-azīz

kyā ajab jo dard-o-ġham ruḳhsat hue

vo bhī the āḳhir 'rasā' apne aziiz

yun ganwata hai koi jaan-e-aziz

zindagi hoti to hum rakhte aziz

kya bataen ab bikhar jaane ke baad

aashiyan tha ya hamein tinke aziz

DhunDhta hai aaj kunj-e-afiyat

dil kabhi jis ko the hangame aziz

husn tha us shahr ka aawargi

aur hamein the panw ke chhaale aziz

ye na qissa hai na andaz-e-bayan

ye mera ahwal hai yar-e-aziz

ghar mein ji lagta nahin aur shahr ke

raste lagte nahin apne aziz

is tarah kya ai ghubar-e-dil koi

raqs karta hai sar-e-ku-e-aziz

sae hain jitne gurezan dhup se

dhup ko hain utne hi sae aziz

ya talluq kuchh na tha ya aap ko

gham hamare ho gae itne aziz

samne aate nahin aur KHwab mein

munh chhupa lete hain duzdan-e-aziz

aankh hai ya sair-gah-e-roz-o-shab

waqt hai ya jada-e-umr-e-aziz

kya ajab jo dard-o-gham ruKHsat hue

wo bhi the aaKHir 'rasa' apne aziz