yun badalti hai kahin barq-o-sharar ki surat

yuuñ badaltī hai kahīñ barq-o-sharar kī sūrat

qābil-e-dīd huī hai gul-e-tar kī sūrat

zulf kī aaḌ meñ thī jān-e-nazar kī sūrat

raat guzrī to nazar aa.ī sahar kī sūrat

un ke lab par hai tabassum mirī āñkhoñ meñ surūr

kyā dikhā.ī hai duāoñ ne asar kī sūrat

qāfile vaalo na.e qāfila-sālār aa.e

ab badal jā.egī andāz-e-safar kī sūrat

kyā karishma hai mire jazba-e-āzādī kā

thī jo dīvār kabhī ab hai vo dar kī sūrat

ab koī hausla-afzā-e-hunar hai 'aḳhtar'

ab nazar aa.egī arbāb-e-hunar kī sūrat

yun badalti hai kahin barq-o-sharar ki surat

qabil-e-did hui hai gul-e-tar ki surat

zulf ki aaD mein thi jaan-e-nazar ki surat

raat guzri to nazar aai sahar ki surat

un ke lab par hai tabassum meri aankhon mein surur

kya dikhai hai duaon ne asar ki surat

qafile walo nae qafila-salar aae

ab badal jaegi andaz-e-safar ki surat

kya karishma hai mere jazba-e-azadi ka

thi jo diwar kabhi ab hai wo dar ki surat

ab koi hausla-afza-e-hunar hai 'aKHtar'

ab nazar aaegi arbab-e-hunar ki surat