ye roz-o-shab ki masafat ye aana jaana mera

ye roz-o-shab kī masāfat ye aanā jaanā mirā

bahut se shahroñ meñ bikhrā hai āb-o-dāna mirā

nahīñ pasand mire tañg-zehn qātil ko

ye harf-e-shukr ye ḳhanjar pe muskurānā mirā

ajiib radd-e-amal thā vo raushnī ke ḳhilāf

jalā jalā ke charāġhoñ ko ḳhud bujhānā mirā

ye chand log mire ās-pās baiThe hue

yahī kamā.ī hai merī yahī ḳhazāna mirā

kahāñ utārūñ janāze ko zindagī tere

ki is ke bojh se shal ho chukā hai shāna mirā

zarā sī baat pe ghar chhoḌ kar chale aanā

phir is ke ba.ad kabhī lauT kar na jaanā mirā

ye baat to mirī zanjīr-e-pā bhī jāntī hai

baḌe sharīf gharānoñ meñ thā gharānā mirā

mizāj apnā milā hī nahīñ zamāne se

na maiñ huā kabhī is kā na ye zamāna mirā

amīr-e-shahr ko bhī qatl kar gayā 'tāriq'

farāz-e-dār pe aa ke ye muskurānā mirā

ye roz-o-shab ki masafat ye aana jaana mera

bahut se shahron mein bikhra hai aab-o-dana mera

nahin pasand mere tang-zehn qatil ko

ye harf-e-shukr ye KHanjar pe muskurana mera

ajib radd-e-amal tha wo raushni ke KHilaf

jala jala ke charaghon ko KHud bujhana mera

ye chand log mere aas-pas baiThe hue

yahi kamai hai meri yahi KHazana mera

kahan utarun janaze ko zindagi tere

ki is ke bojh se shal ho chuka hai shana mera

zara si baat pe ghar chhoD kar chale aana

phir is ke baad kabhi lauT kar na jaana mera

ye baat to meri zanjir-e-pa bhi jaanti hai

baDe sharif gharanon mein tha gharana mera

mizaj apna mila hi nahin zamane se

na main hua kabhi is ka na ye zamana mera

amir-e-shahr ko bhi qatl kar gaya 'tariq'

faraaz-e-dar pe aa ke ye muskurana mera