ye gard-baad-e-tamana mein ghumte hue din

ye gard-bād-e-tamanā meñ ghūmte hue din

kahāñ pe jā ke rukeñge ye bhāgte hue din

ġhurūb hote ga.e raat ke añdheroñ meñ

naved-e-amn ke sūraj ko DhūñDte hue din

na jaane kaun ḳhalā ke ye isti.āre haiñ

tumhāre hijr kī galiyoñ meñ gūñjte hue din

na aap chalte na dete haiñ rāsta ham ko

thakī thakī sī ye shāmeñ ye ūñghte hue din

phir aaj kaise kaTegī pahāḌ jaisī raat

guzar gayā hai yahī baat sochte hue din

tamām umr mire saath saath chalte rahe

tumhīñ ko DhūñDte tum ko pukārte hue din

har ek raat jo tāmīr phir se hotī hai

kaTegā phir vahī dīvār chāTte hue din

mire qarīb se guzre haiñ bār-hā 'amjad'

kisī ke vasl ke vaade ko dekhte hue din

ye gard-baad-e-tamana mein ghumte hue din

kahan pe ja ke rukenge ye bhagte hue din

ghurub hote gae raat ke andheron mein

nawed-e-amn ke suraj ko DhunDte hue din

na jaane kaun KHala ke ye istiare hain

tumhaare hijr ki galiyon mein gunjte hue din

na aap chalte na dete hain rasta hum ko

thaki thaki si ye shamen ye unghte hue din

phir aaj kaise kaTegi pahaD jaisi raat

guzar gaya hai yahi baat sochte hue din

tamam umr mere sath sath chalte rahe

tumhin ko DhunDte tum ko pukarte hue din

har ek raat jo tamir phir se hoti hai

kaTega phir wahi diwar chaTte hue din

mere qarib se guzre hain bar-ha 'amjad'

kisi ke wasl ke wade ko dekhte hue din