ye ajab tumne nikala sona

ye ajab tum ne nikālā sonā

raat kā jāgnā din kā sonā

baḳht-e-ḳhufta se to ummīd nahīñ

saath hogā kabhī us kā sonā

kis qadar hijr meñ behoshī hai

jāgnā bhī hai hamārā sonā

mujh se tañg aa ke ye bole shab-e-vasl

ye hī tum ho to na hogā sonā

bas dam-e-sub.h satāo na mujhe

yaad vo zid hai vo apnā sonā

le ke añgḌā.ī lipaT jaanā haa.e

haa.e vo saath kisī kā sonā

aap karvaT to idhar ko lījiye

jāntā huuñ maiñ tumhārā sonā

sar kahīñ haath kahīñ paañv kahīñ

ye na.ī dhaj hai nirālā sonā

phir shab-e-vasl ho phir ho yā-rab

jāgnā merā aur un kā sonā

āñkheñ phūTeñ jo jhapaktī bhī hoñ

shab-e-tanhā.ī meñ kaisā sonā

vo khulī aañkh vo lab par hai hañsī

ham nahīñ mānte aisā sonā

raat āñkhoñ meñ guzar jaatī hai

in dinoñ hai ye hamārā sonā

haa.e vo vasl kī shab kā aalam

haa.e vo pichhle pahar kā sonā

kyā lage aañkh jo yaad aa.e 'nizām'

rakh ke zaanū pe sar us kā sonā

ye ajab tum ne nikala sona

raat ka jagna din ka sona

baKHt-e-KHufta se to ummid nahin

sath hoga kabhi us ka sona

kis qadar hijr mein behoshi hai

jagna bhi hai hamara sona

mujh se tang aa ke ye bole shab-e-wasl

ye hi tum ho to na hoga sona

bas dam-e-subh satao na mujhe

yaad wo zid hai wo apna sona

le ke angDai lipaT jaana hae

hae wo sath kisi ka sona

aap karwaT to idhar ko lijiye

jaanta hun main tumhaara sona

sar kahin hath kahin panw kahin

ye nai dhaj hai nirala sona

phir shab-e-wasl ho phir ho ya-rab

jagna mera aur un ka sona

aankhen phuTen jo jhapakti bhi hon

shab-e-tanhai mein kaisa sona

wo khuli aankh wo lab par hai hansi

hum nahin mante aisa sona

raat aankhon mein guzar jati hai

in dinon hai ye hamara sona

hae wo wasl ki shab ka aalam

hae wo pichhle pahar ka sona

kya lage aankh jo yaad aae 'nizam'

rakh ke zanu pe sar us ka sona