yaqin kaun karega guman pe aaya hun

yaqīn kaun karegā gumāñ pe aayā huuñ

maiñ apne aap se chhup kar yahāñ pe aayā huuñ

mujhe bhī aql pareshān kartī rahtī hai

nahīñ nahīñ se guzar kar maiñ haañ pe aayā huuñ

mujhe vo dekh ke hairān kyuuñ nahīñ hogā

zamīn oḌh ke maiñ āsmāñ pe aayā huuñ

ye baat tū hī batā kis tarah batā.ūñ tujhe

maiñ dil ke rāste terī zabāñ pe aayā huuñ

na jaane kab se nahīñ mil sakā huuñ maiñ ḳhud se

maiñ ḳhud se milne tire āstāñ pe aayā huuñ

ye iztirāb haqīqat meñ iztirāb nahīñ

ḳhushī ḳhushī maiñ is āh-o-fuġhāñ pe aayā huuñ

mujhe talāsh na kar tū yahāñ vahāñ 'momin'

nazar uThā ki tire ḳhvāb-dāñ pe aayā huuñ

yaqin kaun karega guman pe aaya hun

main apne aap se chhup kar yahan pe aaya hun

mujhe bhi aql pareshan karti rahti hai

nahin nahin se guzar kar main han pe aaya hun

mujhe wo dekh ke hairan kyun nahin hoga

zamin oDh ke main aasman pe aaya hun

ye baat tu hi bata kis tarah bataun tujhe

main dil ke raste teri zaban pe aaya hun

na jaane kab se nahin mil saka hun main KHud se

main KHud se milne tere aastan pe aaya hun

ye iztirab haqiqat mein iztirab nahin

KHushi KHushi main is aah-o-fughan pe aaya hun

mujhe talash na kar tu yahan wahan 'momin'

nazar uTha ki tere KHwab-dan pe aaya hun