yaksan kabhi kisi ki na guzri zamane mein

yaksāñ kabhī kisī kī na guzrī zamāne meñ

yādash-ba-ḳhair baiThe the kal āshiyāne meñ

sadme diye to sabr kī daulat bhī degā vo

kis chiiz kī kamī hai saḳhī ke ḳhazāne meñ

ġhurbat kī maut bhī sabab-e-zikr-e-ḳhair hai

gar ham nahīñ to naam rahegā zamāne meñ

dam bhar meñ ab marīz kā qissa tamām hai

kyūñkar kahūñ ye raat kaTegī fasāne meñ

saaqī maiñ dekhtā huuñ zamīñ āsmāñ kā farq

arsh-e-barīñ meñ aur tire āstāne meñ

dīvāreñ phāñd-phāñd ke dīvāne chal base

ḳhaak uḌ rahī hai chaar taraf qaid-ḳhāne meñ

sayyād is asīrī pe sau jaañ se maiñ fidā

dil-bastagī qafas kī kahāñ āshiyāne meñ

ham aise bad-nasīb ki ab tak na mar ga.e

āñkhoñ ke aage aag lagī āshiyāne meñ

dīvāne ban ke un ke gale se lipaT bhī jaao

kaam apnā kar lo 'yās' bahāne-bahāne meñ

yaksan kabhi kisi ki na guzri zamane mein

yaadash-ba-KHair baiThe the kal aashiyane mein

sadme diye to sabr ki daulat bhi dega wo

kis chiz ki kami hai saKHi ke KHazane mein

ghurbat ki maut bhi sabab-e-zikr-e-KHair hai

gar hum nahin to nam rahega zamane mein

dam bhar mein ab mariz ka qissa tamam hai

kyunkar kahun ye raat kaTegi fasane mein

saqi main dekhta hun zamin aasman ka farq

arsh-e-barin mein aur tere aastane mein

diwaren phand-phand ke diwane chal base

KHak uD rahi hai chaar taraf qaid-KHane mein

sayyaad is asiri pe sau jaan se main fida

dil-bastagi qafas ki kahan aashiyane mein

hum aise bad-nasib ki ab tak na mar gae

aankhon ke aage aag lagi aashiyane mein

diwane ban ke un ke gale se lipaT bhi jao

kaam apna kar lo 'yas' bahane-bahane mein