yaadon ka ajib silsila hai

yādoñ kā ajiib silsila hai

soyā huā dard jaag uThā hai

miT bhī chuke naqsh-e-pā magar dil

mahkī huī chaap sun rahā hai

jaltī huī manziloñ kā raahī

ab apnā hī saaya DhūñDhtā hai

dīvāreñ khaḌī huī haiñ lekin

andar se makān gir rahā hai

pūchhe hai chaTak ke ġhuncha-e-zaḳhm

ai ajnabī terā naam kyā hai

sochoñ ke athāh pāniyoñ meñ

dil barf kā phuul ban gayā hai

kis shola-badan kī yaad aa.ī

dāmān-e-ḳhayāl jal uThā hai

taḳhlīq meñ ḳhud chhupā huā hai

fankār bhī fitratan ḳhudā hai

murjhā ke har ek zard patta

āveza-e-gosh ban gayā hai

sochā hai ye maiñ ne pī ke aksar

nashshe meñ ye raushnī sī kyā hai

shāḳhoñ pe pūjāraneñ sajī haiñ

har phuul chaman kā devtā hai

sahrā-e-vafā meñ mere fan kī

ḳhushbū kā charāġh jal rahā hai

phir pā.eñge ḳhaak se numū ham

'fāriġh' ye usūl-e-irtiqā hai

iz.hār kā jis ko hausla hai

vo apnī sadī kā devtā hai

mansūr se kam nahīñ hai vo bhī

jo apnī zabāñ se boltā hai

vo peḌ hai zindagī kī azmat

jo tund havā se laḌ rahā hai

qātil ko duā.eñ do ki 'fāriġh'

har zaḳhm-e-vafā ġhazal-sarā hai

yaadon ka ajib silsila hai

soya hua dard jag uTha hai

miT bhi chuke naqsh-e-pa magar dil

mahki hui chap sun raha hai

jalti hui manzilon ka rahi

ab apna hi saya DhunDhta hai

diwaren khaDi hui hain lekin

andar se makan gir raha hai

puchhe hai chaTak ke ghuncha-e-zaKHm

ai ajnabi tera nam kya hai

sochon ke athah paniyon mein

dil barf ka phul ban gaya hai

kis shola-badan ki yaad aai

daman-e-KHayal jal uTha hai

taKHliq mein KHud chhupa hua hai

fankar bhi fitratan KHuda hai

murjha ke har ek zard patta

aaweza-e-gosh ban gaya hai

socha hai ye main ne pi ke aksar

nashshe mein ye raushni si kya hai

shaKHon pe pujaranen saji hain

har phul chaman ka dewta hai

sahra-e-wafa mein mere fan ki

KHushbu ka charagh jal raha hai

phir paenge KHak se numu hum

'farigh' ye usul-e-irtiqa hai

izhaar ka jis ko hausla hai

wo apni sadi ka dewta hai

mansur se kam nahin hai wo bhi

jo apni zaban se bolta hai

wo peD hai zindagi ki azmat

jo tund hawa se laD raha hai

qatil ko duaen do ki 'farigh'

har zaKHm-e-wafa ghazal-sara hai