dekhte rah gaye sab munis-o-gham-KHwar mujhe

dekhte rah gaye sab mūnis-o-ġham-ḳhvār mujhe

ek āhang-e-baqā le ga.ī us paar mujhe

shab ko ik naġhma-e-be-lafz hai dil kī āvāz

gum na kar de ye mire saaz kī jhankār mujhe

jaane ye 'ishq kā fan hai ki musavvir kā kamāl

us kī tasvīr se kartā hai jo iz.hār mujhe

un ke kūche meñ bahar-gām ye hotā hai gumāñ

jaise pahchān rahe hoñ dar-o-dīvār mujhe

jin nasheboñ meñ nahīñ nashv-o-numā ke jauhar

un pe qudrat ne kiyā lā ke ziyā-bār mujhe

shart taqdīs-e-safar hai ye ta'ajjub to nahīñ

chal paḌe le ke jo ye ret kī dīvār mujhe

tishnagī aatī hai har qaus meñ har ḳhat meñ nazar

ḳhatm sadiyoñ meñ karegā mirā fankār mujhe

dekhtā huuñ jo cinemāoñ pe ḳhilqat kā hujūm

band hote nazar aate haiñ ye bāzār mujhe

jaane us husn ke bāzār pe kyā biit ga.ī

muñh dikhāte nahīñ kyuuñ us ke ḳharīdār mujhe

khet jab tez havāoñ se nirat karte haiñ

lagte haiñ baḌh ke hasīnoñ se tarahdār mujhe

merī dukkān meñ qindīl jaleñ yā na jaleñ

jānte haiñ mirī san'at ke ḳharīdār mujhe

baa'z guldastoñ ke phūloñ se sar-e-bazm-e-suḳhan

saaf aa.ī hai mire ḳhuun kī mah-kār mujhe

mujh ko tanhā na karo rang-e-jahāñ hai kuchh aur

kal kā sūraj nazar aatā hai dhuāñ-dhār mujhe

ab to dastak bhī koī de to sharar uḌte haiñ

jald patthar se nikāle mirā fankār mujhe

utrā jis roz bhī 'dānish' mirā miTTī kā libās

pā sakegī na kahīñ vaqt kī raftār mujhe

dekhte rah gaye sab munis-o-gham-KHwar mujhe

ek aahang-e-baqa le gai us par mujhe

shab ko ek naghma-e-be-lafz hai dil ki aawaz

gum na kar de ye mere saz ki jhankar mujhe

jaane ye 'ishq ka fan hai ki musawwir ka kamal

us ki taswir se karta hai jo izhaar mujhe

un ke kuche mein bahar-gam ye hota hai guman

jaise pahchan rahe hon dar-o-diwar mujhe

jin nashebon mein nahin nashw-o-numa ke jauhar

un pe qudrat ne kiya la ke ziya-bar mujhe

shart taqdis-e-safar hai ye ta'ajjub to nahin

chal paDe le ke jo ye ret ki diwar mujhe

tishnagi aati hai har qaus mein har KHat mein nazar

KHatm sadiyon mein karega mera fankar mujhe

dekhta hun jo cinemaon pe KHilqat ka hujum

band hote nazar aate hain ye bazar mujhe

jaane us husn ke bazar pe kya bit gai

munh dikhate nahin kyun us ke KHaridar mujhe

khet jab tez hawaon se nirat karte hain

lagte hain baDh ke hasinon se tarahdar mujhe

meri dukkan mein qindil jalen ya na jalen

jaante hain meri san'at ke KHaridar mujhe

ba'z guldaston ke phulon se sar-e-bazm-e-suKHan

saf aai hai mere KHun ki mah-kar mujhe

mujh ko tanha na karo rang-e-jahan hai kuchh aur

kal ka suraj nazar aata hai dhuan-dhaar mujhe

ab to dastak bhi koi de to sharar uDte hain

jald patthar se nikale mera fankar mujhe

utra jis roz bhi 'danish' mera miTTi ka libas

pa sakegi na kahin waqt ki raftar mujhe