qais ruKHsat hua duniya se to farhad aaya

qais ruḳhsat huā duniyā se to farhād aayā

ek nāshād gayā dūsrā nāshād aayā

yaad apnā mujhe phir ḳhāna-e-barbād aayā

kyuuñ qafas le ke mire baaġh meñ sayyād aayā

yuuñ zabāñ par mire kab shikva-e-bedād aayā

jab kiye zulm butoñ ne to ḳhudā yaad aayā

be-vafā us pe vafādāroñ kā jānī-dushman

haa.e aayā bhī to kis par dil-e-nā-shād aayā

terī hī yaad se ābād rahā ḳhāna-e-dil

baiThte uThte hamesha mujhe tū yaad aayā

merī aahoñ ne uḌā Daale qafas ke TukḌe

kis liye ab mire par kholne sayyād aayā

qatl kar ke mujhe hasrat se vo ro kar bole

haa.e kis vaqt tirā 'ahd-e-vafā yaad aayā

ā.ina-ḳhāna mire dil kā pasand us ko huā

ban ke is shīsh-mahal meñ vo parī-zād aayā

yaad meñ terī muravvat hai ki aa jaatī hai

be-vafā tū bhī kabhī karne ko dil shaad aayā

ganj qārūñ ko jo allāh ne baḳhshā 'mohsin'

phir na us vaqt ke bande ko ḳhudā yaad aayā

qais ruKHsat hua duniya se to farhad aaya

ek nashad gaya dusra nashad aaya

yaad apna mujhe phir KHana-e-barbaad aaya

kyun qafas le ke mere bagh mein sayyaad aaya

yun zaban par mere kab shikwa-e-bedad aaya

jab kiye zulm buton ne to KHuda yaad aaya

be-wafa us pe wafadaron ka jaani-dushman

hae aaya bhi to kis par dil-e-na-shad aaya

teri hi yaad se aabaad raha KHana-e-dil

baiThte uThte hamesha mujhe tu yaad aaya

meri aahon ne uDa Dale qafas ke TukDe

kis liye ab mere par kholne sayyaad aaya

qatl kar ke mujhe hasrat se wo ro kar bole

hae kis waqt tera 'ahd-e-wafa yaad aaya

aaina-KHana mere dil ka pasand us ko hua

ban ke is shish-mahal mein wo pari-zad aaya

yaad mein teri murawwat hai ki aa jati hai

be-wafa tu bhi kabhi karne ko dil shad aaya

ganj qarun ko jo allah ne baKHsha 'mohsin'

phir na us waqt ke bande ko KHuda yaad aaya