na to main hi KHud se hun mutmain na yun hai ki mauj-e-bala nahin

na to maiñ hī ḳhud se huuñ mutma.in na yuuñ hai ki mauj-e-balā nahīñ

pa ḳhudā-e-pāk ke rū-barū kabhī uThte dast-e-du'ā nahīñ

ye ġhurūr-o-zo'm hai nā-ravā ye sitam ye zulm hai be-sabab

tah-e-ḳhāk tujh ko bhī honā hai tū bhī aadmī hai ḳhudā nahīñ

tū ki us kī zulf kī ḳhush-bū hai tirā ek apnā maqām hai

tirī rū meñ bād-e-nasīm hai tū asīr-e-bād-e-sabā nahīñ

mujhe muztarib hī na kar sakī vo ḳhalish vo shoḳhī-e-naqsh-e-pā

tirī chaal meñ vo adā nahīñ tirī āñkhoñ meñ bhī hayā nahīñ

na faqīh-e-shar' ke hukm par na amīr-e-shahr ke amr par

tire dar ko chhoḌ ke ai ḳhudā maiñ kisī ke dar pe jhukā nahīñ

mire dil ko aaj sukūñ nahīñ mirī jaan aaj hai muztarib

tire lab kī kaliyāñ khilī nahīñ tirā tīr-e-chashm chalā nahīñ

tire zulm kī hoñ vo āñdhiyāñ yā thapeḌe mauj-e-balā ke hoñ

mirā 'ishq aisā charāġh hai jo kisī bhī vaqt bujhā nahīñ

tū bhī bad-gumān hai be-sabab hai abhī bhī us ko tirī talab

use tanhā aise na chhoḌ ki tirā 'sānī' itnā burā nahīñ

na to main hi KHud se hun mutmain na yun hai ki mauj-e-bala nahin

pa KHuda-e-pak ke ru-baru kabhi uThte dast-e-du'a nahin

ye ghurur-o-zo'm hai na-rawa ye sitam ye zulm hai be-sabab

tah-e-KHak tujh ko bhi hona hai tu bhi aadmi hai KHuda nahin

tu ki us ki zulf ki KHush-bu hai tera ek apna maqam hai

teri ru mein baad-e-nasim hai tu asir-e-baad-e-saba nahin

mujhe muztarib hi na kar saki wo KHalish wo shoKHi-e-naqsh-e-pa

teri chaal mein wo ada nahin teri aankhon mein bhi haya nahin

na faqih-e-shar' ke hukm par na amir-e-shahr ke amr par

tere dar ko chhoD ke ai KHuda main kisi ke dar pe jhuka nahin

mere dil ko aaj sukun nahin meri jaan aaj hai muztarib

tere lab ki kaliyan khili nahin tera tir-e-chashm chala nahin

tere zulm ki hon wo aandhiyan ya thapeDe mauj-e-bala ke hon

mera 'ishq aisa charagh hai jo kisi bhi waqt bujha nahin

tu bhi bad-guman hai be-sabab hai abhi bhi us ko teri talab

use tanha aise na chhoD ki tera 'sani' itna bura nahin