kuchh bhi tere mizaj se haT kar nahin kaha

kuchh bhī tire mizāj se haT kar nahīñ kahā

behtar kiyā bhī tujh se to behtar nahīñ kahā

ham sirf tujh ko sunte haiñ misra' uThāte haiñ

mahfil meñ terī ḳhud ko suḳhanvar nahīñ kahā

dīvār-o-dar meñ kyā nazar aayā ki tum use

merā makān kahte rahe ghar nahīñ kahā

nārāz ho gayā mirā kuuza ba-dast dost

jab maiñ ne shukriye meñ samundar nahīñ kahā

denā thā koī tujh ko rivāyat se haT ke naam

sah kar tire sitam bhī sitam-gar nahīñ kahā

mazdūr the banā liiñ mashīnī 'alāmateñ

tashbīh dī to bāda-o-sāġhar nahīñ kahā

duniyā Thahar ga.ī tire inkār kī jagah

ik din thā tū ne yūñhī palaT kar nahīñ kahā

ham ne to phuul jaise likhe haiñ tamām lafz

ham mānte haiñ ek bhī nashtar nahīñ kahā

kuchh bhi tere mizaj se haT kar nahin kaha

behtar kiya bhi tujh se to behtar nahin kaha

hum sirf tujh ko sunte hain misra' uThate hain

mahfil mein teri KHud ko suKHanwar nahin kaha

diwar-o-dar mein kya nazar aaya ki tum use

mera makan kahte rahe ghar nahin kaha

naraaz ho gaya mera kuza ba-dast dost

jab main ne shukriye mein samundar nahin kaha

dena tha koi tujh ko riwayat se haT ke nam

sah kar tere sitam bhi sitam-gar nahin kaha

mazdur the bana lin mashini 'alamaten

tashbih di to baada-o-saghar nahin kaha

duniya Thahar gai tere inkar ki jagah

ek din tha tu ne yunhi palaT kar nahin kaha

hum ne to phul jaise likhe hain tamam lafz

hum mante hain ek bhi nashtar nahin kaha