KHudi ka raaz agar us nai aashkar kiya

ḳhudī kā raaz agar us nai āshkār kiyā

use zabān na dī jis ko rāz-dār kiyā

is ehtimām se vā'de par e'tibār kiyā

lagā ke 'umr kā sarmāya intizār kiyā

sukūn paane ko ham ne ḳhayāl-e-yār kiyā

ḳhayāl-e-yār ne kuchh aur be-qarār kiyā

kiyā junūn meñ jab tak lihāz-e-yār kiyā

phir us ke baa'd garebāñ ko taar taar kiyā

kabhī vafā ne ijāzat na dī taḌapne kī

vufūr-e-ġham ne taqāza to baar baar kiyā

hai e'tibār koī jurm to sazā diije

gunāhgār ne rahmat pe e'tibār kiyā

agar ho hashr meñ pursish to ham bhī pūchheñge

gunāhgār ko kis ne gunāhgār kiyā

kalī kī 'umr na kyuuñ muskurāte guzregī

khulī jab aañkh to nazzāra-e-bahār kiyā

'adīl' dost se dushman hī phir ġhanīmat hai

kiyā jab us ne muqābil meñ aa ke vaar kiyā

KHudi ka raaz agar us nai aashkar kiya

use zaban na di jis ko raaz-dar kiya

is ehtimam se wa'de par e'tibar kiya

laga ke 'umr ka sarmaya intizar kiya

sukun pane ko hum ne KHayal-e-yar kiya

KHayal-e-yar ne kuchh aur be-qarar kiya

kiya junun mein jab tak lihaz-e-yar kiya

phir us ke ba'd gareban ko tar tar kiya

kabhi wafa ne ijazat na di taDapne ki

wufur-e-gham ne taqaza to bar bar kiya

hai e'tibar koi jurm to saza dije

gunahgar ne rahmat pe e'tibar kiya

agar ho hashr mein pursish to hum bhi puchhenge

gunahgar ko kis ne gunahgar kiya

kali ki 'umr na kyun muskuraate guzregi

khuli jab aankh to nazzara-e-bahaar kiya

'adil' dost se dushman hi phir ghanimat hai

kiya jab us ne muqabil mein aa ke war kiya