wo to KHushbu hai har ek samt bikharna hai use

vo to ḳhushbū hai har ik samt bikharnā hai use

dil ko kyuuñ zid hai ki āġhosh meñ bharnā hai use

kyuuñ sadā pahne vo terā hī pasandīda libās

kuchh to mausam ke mutābiq bhī sañvarnā hai use

us ko gulchīñ kī nigāhoñ se bachā.e maulā

vo to ġhuncha hai abhī aur nikharnā hai use

har taraf chāhne vāloñ kī bichhī haiñ palkeñ

dekhiye kaun se raste se guzarnā hai use

dil ko samjhā leñ abhī se to munāsib hogā

ik na ik roz to va.ade se mukarnā hai use

ham ne tasvīr hai ḳhvāboñ kī mukammal kar lī

ek rañg-e-hinā baaqī hai jo bharnā hai use

ḳhvāb meñ bhī kabhī chhūnā to vazū kar ke 'sadā'

kabhī mailā kabhī rusvā nahīñ karnā hai use

wo to KHushbu hai har ek samt bikharna hai use

dil ko kyun zid hai ki aaghosh mein bharna hai use

kyun sada pahne wo tera hi pasandida libas

kuchh to mausam ke mutabiq bhi sanwarna hai use

us ko gulchin ki nigahon se bachae maula

wo to ghuncha hai abhi aur nikharna hai use

har taraf chahne walon ki bichhi hain palken

dekhiye kaun se raste se guzarna hai use

dil ko samjha len abhi se to munasib hoga

ek na ek roz to wade se mukarna hai use

hum ne taswir hai KHwabon ki mukammal kar li

ek rang-e-hina baqi hai jo bharna hai use

KHwab mein bhi kabhi chhuna to wazu kar ke 'sada'

kabhi maila kabhi ruswa nahin karna hai use