wo shah-e-husn jo be-misl hai hasinon mein

vo shāh-e-husn jo be-misl hai hasīnoñ meñ

kabhī faqīr bhī thā un ke ham-nashīnoñ meñ

agar hayāt hai dekheñge ek din dīdār

ki māh-e-īd bhī āḳhir hai in mahīnoñ meñ

na iḳhtilāt na vo aañkh hai na vo chitvan

ye kyā sabab ki paḌā farq sab qarīnoñ meñ

nahīñ butoñ ke tasavvur se koī dil ḳhālī

ḳhudā ne un ko diye haiñ makān sīnoñ meñ

ma.āl-e-kār vahī sab kā hai vahī āġhāz

hazār farq kareñ ḳhud-parast dīnoñ meñ

abas harīs havas se zalīl hote haiñ

amiT hai 'barq' jo tahrīr hai jabīnoñ meñ

wo shah-e-husn jo be-misl hai hasinon mein

kabhi faqir bhi tha un ke ham-nashinon mein

agar hayat hai dekhenge ek din didar

ki mah-e-id bhi aaKHir hai in mahinon mein

na iKHtilat na wo aankh hai na wo chitwan

ye kya sabab ki paDa farq sab qarinon mein

nahin buton ke tasawwur se koi dil KHali

KHuda ne un ko diye hain makan sinon mein

maal-e-kar wahi sab ka hai wahi aaghaz

hazar farq karen KHud-parast dinon mein

abas haris hawas se zalil hote hain

amiT hai 'barq' jo tahrir hai jabinon mein