wo KHanuman-KHarab na kyun dar-ba-dar phire

vo ḳhānumāñ-ḳharāb na kyuuñ dar-ba-dar phire

jis se tirī nigāh mile yā nazar phire

rāh-e-junūñ meñ yuuñ to haiñ lākhoñ hī sar-phire

yā-rab mirī tarah na koī umr bhar phire

raftār-e-yār kā agar andāz bhuul jaa.e

gulshan meñ ḳhaak uḌātī nasīm-e-sahar phire

saaqī ko bhī sikhāte haiñ ādāb-e-mai-kashī

milte haiñ mai-kade meñ kuchh aise bhī sar-phire

tark-e-vatan ke ba.ad hī qadr-e-vatan huī

barsoñ mirī nigāh meñ dīvār-o-dar phire

rah jaa.e chand roz jo bīmār-e-ġham ke paas

ḳhud apnā dil dabā.e hue chāra-gar phire

maiñ apnā raqs-e-jām tujhe bhī dikhā.ūñgā

ai gardish-e-zamāna mire din agar phire

merī nigāh meñ to ġhazal hai usī kā naam

jis kī ragoñ meñ dauḌtā ḳhūn-e-jigar phire

qaid-e-ġham-e-hayāt bhī kyā chiiz hai 'fanā'

rāh-e-farār mil na sakī umr-bhar phire

wo KHanuman-KHarab na kyun dar-ba-dar phire

jis se teri nigah mile ya nazar phire

rah-e-junun mein yun to hain lakhon hi sar-phire

ya-rab meri tarah na koi umr bhar phire

raftar-e-yar ka agar andaz bhul jae

gulshan mein KHak uDati nasim-e-sahar phire

saqi ko bhi sikhate hain aadab-e-mai-kashi

milte hain mai-kade mein kuchh aise bhi sar-phire

tark-e-watan ke baad hi qadr-e-watan hui

barson meri nigah mein diwar-o-dar phire

rah jae chand roz jo bimar-e-gham ke pas

KHud apna dil dabae hue chaara-gar phire

main apna raqs-e-jam tujhe bhi dikhaunga

ai gardish-e-zamana mere din agar phire

meri nigah mein to ghazal hai usi ka nam

jis ki ragon mein dauDta KHun-e-jigar phire

qaid-e-gham-e-hayat bhi kya chiz hai 'fana'

rah-e-farar mil na saki umr-bhar phire