wo ek KHema-e-shab jis ka nam duniya tha

vo ek ḳhema-e-shab jis kā naam duniyā thā

kabhī dhuāñ to kabhī chāñdnī sā lagtā thā

hamārī aag bhī taapī hameñ bujhā bhī diyā

jahāñ paḌāv kiyā thā ajiib sahrā thā

havā meñ merī anā bhīgtī rahī varna

maiñ āshiyāne meñ barsāt kaaT saktā thā

jo āsmān bhī TuuTā girā mirī chhat par

mire makāñ se kisī bad-duā kā rishta thā

tum aa ga.e ho ḳhudā kā subūt hai ye bhī

qasam ḳhudā kī abhī maiñ ne tum ko sochā thā

zamīñ pe TuuT ke kaise girā ġhurūr us kā

abhī abhī to use āsmāñ pe dekhā thā

bhañvar lapeT ke nīche utar gayā shāyad

abhī vo shaam se pahle nadī pe baiThā thā

maiñ shāḳh-e-zard ke mātam meñ rah gayā 'qaisar'

ḳhizāñ kā zahr shajar kī jaḌoñ meñ phailā thā

wo ek KHema-e-shab jis ka nam duniya tha

kabhi dhuan to kabhi chandni sa lagta tha

hamari aag bhi tapi hamein bujha bhi diya

jahan paDaw kiya tha ajib sahra tha

hawa mein meri ana bhigti rahi warna

main aashiyane mein barsat kaT sakta tha

jo aasman bhi TuTa gira meri chhat par

mere makan se kisi bad-dua ka rishta tha

tum aa gae ho KHuda ka subut hai ye bhi

qasam KHuda ki abhi main ne tum ko socha tha

zamin pe TuT ke kaise gira ghurur us ka

abhi abhi to use aasman pe dekha tha

bhanwar lapeT ke niche utar gaya shayad

abhi wo sham se pahle nadi pe baiTha tha

main shaKH-e-zard ke matam mein rah gaya 'qaisar'

KHizan ka zahr shajar ki jaDon mein phaila tha