shauq-e-talab rahe kabhi zauq-e-talab rahe

shauq-e-talab rahe kabhī zauq-e-talab rahe

dariyā thā sāmne hī magar tishna-lab rahe

us ne nibhā.e kyuuñ nahīñ dastūr-e-‘āshiqī

har dam isī ḳhayāl se ham jāñ-ba-lab rahe

ḳhuddāriyoñ ne hī nahīñ baḌhne diye qadam

hālāñki un kī yaad meñ ham roz-o-shab rahe

ye hai sharaf makīn hue is jagah pe ham

dillī meñ auliyā rahe ahl-e-adab rahe

koī bhī dard dil kā mudāvā na kar sakā

kahne ko shahr bhar meñ bahut se matab rahe

un ko bhī naaz thā baḌā ham bhī the zo'm meñ

tark-e-ta'alluqāt ke ye bhī sabab rahe

'irshād' ham se 'ishq kī barbādiyāñ na pūchh

bechainiyāñ thiiñ aur bhī kyā kyā ġhazab rahe

shauq-e-talab rahe kabhi zauq-e-talab rahe

dariya tha samne hi magar tishna-lab rahe

us ne nibhae kyun nahin dastur-e-‘ashiqi

har dam isi KHayal se hum jaan-ba-lab rahe

KHuddariyon ne hi nahin baDhne diye qadam

haalanki un ki yaad mein hum roz-o-shab rahe

ye hai sharaf makin hue is jagah pe hum

dilli mein auliya rahe ahl-e-adab rahe

koi bhi dard dil ka mudawa na kar saka

kahne ko shahr bhar mein bahut se matab rahe

un ko bhi naz tha baDa hum bhi the zo'm mein

tark-e-ta'alluqat ke ye bhi sabab rahe

'irshad' hum se 'ishq ki barbaadiyan na puchh

bechainiyan thin aur bhi kya kya ghazab rahe