wo dil mile ki wusat-e-sahra jala kare

vo dil mile ki vus'at-e-sahrā jalā kare

vo ġham mile ki dāman-e-dil par hañsā kare

ubhre haiñ kuchh nuqūsh to Dhalne lagī hai raat

uTThe koī darāzī-e-shab kī du'ā kare

kitnā hasīñ hai shaam kī vīrāniyoñ kā dard

jo chāñd ban ke sīna-e-shab meñ uThā kare

itnī sakat kahāñ ki na.ī choT sah sakeñ

ab ke baras bahār na aa.e ḳhudā kare

ai daur-e-nā-sipās bhalā ye to kam se kam

maiñ dekhūñ aur koī kisī se vafā kare

kitne guloñ kī laaj hai 'fāzil' vo ek ḳhaar

jis se kisī kā chāk-e-girebāñ silā kare

wo dil mile ki wus'at-e-sahra jala kare

wo gham mile ki daman-e-dil par hansa kare

ubhre hain kuchh nuqush to Dhalne lagi hai raat

uTThe koi daraazi-e-shab ki du'a kare

kitna hasin hai sham ki viraniyon ka dard

jo chand ban ke sina-e-shab mein uTha kare

itni sakat kahan ki nai choT sah saken

ab ke baras bahaar na aae KHuda kare

ai daur-e-na-sipas bhala ye to kam se kam

main dekhun aur koi kisi se wafa kare

kitne gulon ki laj hai 'fazil' wo ek KHar

jis se kisi ka chaak-e-gireban sila kare