uTTha hai abr josh ka aalam liye hue

uTThā hai abr josh kā aalam liye hue

baiThā huuñ maiñ bhī dīda-e-pur-nam liye hue

saaqī kī chashm-e-mast kā aalam na pūchhiye

ik ik nigāh hai ka.ī aalam liye hue

shabnam nahīñ guloñ pe ye qatre haiñ ashk ke

guzrā hai koī dīda-e-pur-nam liye hue

tai kar rahā huuñ ishq kī dushvār manzileñ

āh-e-darāz o girya-e-paiham liye hue

uTh ai naqāb-e-yār ki baiThe haiñ der se

kitne ġharīb dīda-e-pur-nam liye hue

suntā huuñ un kī bazm meñ chhalkeñge aaj jaam

maiñ bhī chalā huuñ dīda-e-pur-nam liye hue

motī kī qadr sab ko hai phūloñ ko dekhiye

kyā hañs rahe haiñ qatra-e-shabnam liye hue

josh-e-junūñ meñ lutf-e-tasavvur na pūchhiye

phirte haiñ saath saath unheñ ham liye hue

dil kī lagī na un se bujhī aaj tak 'jalīl'

dariyā haiñ garche dīda-e-pur-nam liye hue

uTTha hai abr josh ka aalam liye hue

baiTha hun main bhi dida-e-pur-nam liye hue

saqi ki chashm-e-mast ka aalam na puchhiye

ek ek nigah hai kai aalam liye hue

shabnam nahin gulon pe ye qatre hain ashk ke

guzra hai koi dida-e-pur-nam liye hue

tai kar raha hun ishq ki dushwar manzilen

aah-e-daraaz o girya-e-paiham liye hue

uTh ai naqab-e-yar ki baiThe hain der se

kitne gharib dida-e-pur-nam liye hue

sunta hun un ki bazm mein chhalkenge aaj jam

main bhi chala hun dida-e-pur-nam liye hue

moti ki qadr sab ko hai phulon ko dekhiye

kya hans rahe hain qatra-e-shabnam liye hue

josh-e-junun mein lutf-e-tasawwur na puchhiye

phirte hain sath sath unhen hum liye hue

dil ki lagi na un se bujhi aaj tak 'jalil'

dariya hain garche dida-e-pur-nam liye hue