un se ummid-e-ru-numai hai

un se ummīd-e-rū-numā.ī hai

kyā nigāhoñ kī maut aa.ī hai

husn masrūf-e-ḳhud-numā.ī hai

ishq kā daur ibtidā.ī hai

dil ne ġham se shikast khaa.ī hai

umr-e-rafta tirī duhā.ī hai

dil kī barbādiyoñ pe nāzāñ huuñ

fat.h pā kar shikast khaa.ī hai

mere ma.abad nahīñ haiñ dair-o-haram

ehtiyātan jabīñ jhukā.ī hai

vo havā de rahe haiñ dāman kī

haa.e kis vaqt niiñd aa.ī hai

khul gayā un kī aarzū meñ ye raaz

ziist apnī nahīñ parā.ī hai

sham.a parvāna hoñ ki ġhuncha-o-gul

zindagī kis ko raas aa.ī hai

gul fasurda chaman udaas 'shakīl'

yuuñ bhī aksar bahār aa.ī hai

un se ummid-e-ru-numai hai

kya nigahon ki maut aai hai

husn masruf-e-KHud-numai hai

ishq ka daur ibtidai hai

dil ne gham se shikast khai hai

umr-e-rafta teri duhai hai

dil ki barbaadiyon pe nazan hun

fath pa kar shikast khai hai

mere mabad nahin hain dair-o-haram

ehtiyatan jabin jhukai hai

wo hawa de rahe hain daman ki

hae kis waqt nind aai hai

khul gaya un ki aarzu mein ye raaz

zist apni nahin parai hai

shama parwana hon ki ghuncha-o-gul

zindagi kis ko ras aai hai

gul fasurda chaman udas 'shakil'

yun bhi aksar bahaar aai hai