un ko bulaen aur wo na aaen to kya karen

un ko bulā.eñ aur vo na aa.eñ to kyā kareñ

bekār jaa.eñ apnī duā.eñ to kyā kareñ

ik zohara-vash hai aañkh ke pardoñ meñ jalvagar

nazroñ meñ āsmāñ na samā.eñ to kyā kareñ

maanā ki sab ke sāmne milne se hai hijāb

lekin vo ḳhvāb meñ bhī na aa.eñ to kyā kareñ

ham laakh qasmeñ khā.eñ na milne kī sab ġhalat

vo duur hī se dil ko lubhā.eñ to kyā kareñ

bad-qismatoñ kā yaad na karne pe hai ye haal

allāh agar vo yaad hī aa.eñ to kyā kareñ

nāseh hamārī tauba meñ kuchh shak nahīñ magar

shāna hilā.eñ aa ke ghaTā.eñ to kyā kareñ

mai-ḳhāna duur rāsta tārīk ham marīz

muñh pher deñ udhar jo havā.eñ to kyā kareñ

rātoñ ke dil meñ yaad basā.eñ kisī kī ham

'aḳhtar' haram meñ vo na bulā.eñ to kyā kareñ

un ko bulaen aur wo na aaen to kya karen

bekar jaen apni duaen to kya karen

ek zohara-wash hai aankh ke pardon mein jalwagar

nazron mein aasman na samaen to kya karen

mana ki sab ke samne milne se hai hijab

lekin wo KHwab mein bhi na aaen to kya karen

hum lakh qasmen khaen na milne ki sab ghalat

wo dur hi se dil ko lubhaen to kya karen

bad-qismaton ka yaad na karne pe hai ye haal

allah agar wo yaad hi aaen to kya karen

naseh hamari tauba mein kuchh shak nahin magar

shana hilaen aa ke ghaTaen to kya karen

mai-KHana dur rasta tarik hum mariz

munh pher den udhar jo hawaen to kya karen

raaton ke dil mein yaad basaen kisi ki hum

'aKHtar' haram mein wo na bulaen to kya karen