guzar raha hun teri rah-guzar se pahli bar

guzar rahā huuñ tirī rah-guzar se pahlī baar

maiñ thak na jā.ūñ musalsal safar se pahlī baar

na shāḳh-e-gul pe koī hogā āshiyāñ mahfūz

ḳhabar milī hai ye barq-o-sharar se pahlī baar

zamīñ pe TuuT ke bikhrā huā hai merā vujūd

maiñ gir gayā huuñ kisī kī nazar se pahlī baar

vo ek roz kināre pe Duub jā.egā

jo bach gayā hai shanāvar bhañvar se pahlī baar

javāb dene meñ Dhal jaa.e na ye 'umr tamām

jo ik savāl huā hai udhar se pahlī baar

yahī du'ā hai ḳhudā un ko kāmyābī de

jo jang jītne nikle haiñ ghar se pahlī baar

ka.ī dinoñ se tabī'at hai pur-sukūñ 'muztar'

utar gayā hai koī bojh sar se pahlī baar

guzar raha hun teri rah-guzar se pahli bar

main thak na jaun musalsal safar se pahli bar

na shaKH-e-gul pe koi hoga aashiyan mahfuz

KHabar mili hai ye barq-o-sharar se pahli bar

zamin pe TuT ke bikhra hua hai mera wujud

main gir gaya hun kisi ki nazar se pahli bar

wo ek roz kinare pe Dub jaega

jo bach gaya hai shanawar bhanwar se pahli bar

jawab dene mein Dhal jae na ye 'umr tamam

jo ek sawal hua hai udhar se pahli bar

yahi du'a hai KHuda un ko kaamyabi de

jo jang jitne nikle hain ghar se pahli bar

kai dinon se tabi'at hai pur-sukun 'muztar'

utar gaya hai koi bojh sar se pahli bar