uge na bij mashaqqat agarche kam nahin ki

uge na biij mashaqqat agarche kam nahīñ kī

khulā- ye baa'd meñ ham ne zamīñ hī nam nahīñ kī

hameñ ye Dar thā ki uktā na jaa.eñ kuchh din meñ

so qist-vār mohabbat kī ek dam nahīñ kī

vo kaisā 'ishq thā māthe pe ik shikan bhī na thī

ye kaisā hijr hai jis ne kamar bhī ḳham nahīñ kī

jo mujh se rabt kā ḳhvāhāñ thā us se duur rahā

kisī kī raushnī is tīrgī meñ zam nahīñ kī

junūñ ke daaġh hamesha dimāġh par chhoḌe

kisī badan pe koī dāstāñ raqam nahīñ kī

jab iḳhtilāf kiyā us ne zimnī bātoñ par

to phir vo baat jo karne ga.e the ham nahīñ kī

tujhe ye dukh hai ki kyoñ baat kaaT dī terī

vo jis kī baat thī ḳhush ho zabāñ qalam nahīñ kī

uge na bij mashaqqat agarche kam nahin ki

khula- ye ba'd mein hum ne zamin hi nam nahin ki

hamein ye Dar tha ki ukta na jaen kuchh din mein

so qist-war mohabbat ki ek dam nahin ki

wo kaisa 'ishq tha mathe pe ek shikan bhi na thi

ye kaisa hijr hai jis ne kamar bhi KHam nahin ki

jo mujh se rabt ka KHwahan tha us se dur raha

kisi ki raushni is tirgi mein zam nahin ki

junun ke dagh hamesha dimagh par chhoDe

kisi badan pe koi dastan raqam nahin ki

jab iKHtilaf kiya us ne zimni baaton par

to phir wo baat jo karne gae the hum nahin ki

tujhe ye dukh hai ki kyon baat kaT di teri

wo jis ki baat thi KHush ho zaban qalam nahin ki