tumhaare ishq mein hum nang-o-nam bhul gae

tumhāre ishq meñ ham nañg-o-nām bhuul ga.e

jahāñ meñ kaam the jitne tamām bhuul ga.e

namāziyoñ ne tujh abrū ko dekh masjid meñ

ba-samt-e-qibla sujūd-o-qayām bhuul ga.e

ye vaz.a kyā hai ki hote nahīñ ho dast-basar

abhī se apnoñ kā lenā salām bhuul ga.e

ga.e the zo.am meñ apne par us ko dekhte hī

jo dil ne ham se kahe the payām bhuul ga.e

tirī taraf huī sūrat-garān-e-chīñ kī nigāh

qalam ko haath se rakh apnā kaam bhuul ga.e

butān-e-charb-zabāñ sun ke ḳhūbi-e-guftār

adab meñ dab ga.e husn-e-kalām bhuul ga.e

tirī ai sarv-e-ravāñ dekh kar anokhī chaal

jo ḳhush-ḳhirām the apnā ḳhirām bhuul ga.e

tirī ye zulf-e-girah-gīr dekh kar sayyād

shikār aap hue said o daam bhuul ga.e

baḌā ġhazab hai ki 'hātim' ko tum na pahchānā

vahī qadīm tumhārā ġhulām bhuul ga.e

tumhaare ishq mein hum nang-o-nam bhul gae

jahan mein kaam the jitne tamam bhul gae

namaziyon ne tujh abru ko dekh masjid mein

ba-samt-e-qibla sujud-o-qayam bhul gae

ye waza kya hai ki hote nahin ho dast-basar

abhi se apnon ka lena salam bhul gae

gae the zoam mein apne par us ko dekhte hi

jo dil ne hum se kahe the payam bhul gae

teri taraf hui surat-garan-e-chin ki nigah

qalam ko hath se rakh apna kaam bhul gae

butan-e-charb-zaban sun ke KHubi-e-guftar

adab mein dab gae husn-e-kalam bhul gae

teri ai sarw-e-rawan dekh kar anokhi chaal

jo KHush-KHiram the apna KHiram bhul gae

teri ye zulf-e-girah-gir dekh kar sayyaad

shikar aap hue said o dam bhul gae

baDa ghazab hai ki 'hatim' ko tum na pahchana

wahi qadim tumhaara ghulam bhul gae