tum bhi nigah mein ho adu bhi nazar mein hai

tum bhī nigāh meñ ho adū bhī nazar meñ hai

duniyā hamāre dīda-e-hasrat-nagar meñ hai

haañ jānte haiñ jaan kā ḳhvāhāñ tumhīñ ko ham

mālūm hai ki teġh tumhārī kamar meñ hai

kyā rashk hai ki ek kā hai ek mudda.ī

tum dil meñ ho to dard hamāre jigar meñ hai

go ġhair kī baġhal meñ sahī vo parī-jamāl

maiñ to yahī kahūñgā ki merī nazar meñ hai

donoñ ne dard-e-ishq ko taqsīm kar liyā

thoḌā sā dil meñ hai to zarā sā jigar meñ hai

maiñ bhī huuñ aaj maiñ ki bar aa.ī murād-e-dil

dil bhī hai aaj dil ki vo mehmān ghar meñ hai

mamnūn huuñ ḳhayāl kā apne shab-e-firāq

jo sāmne nazar ke nahīñ vo nazar meñ hai

dilbar ho ek tum ki hamārī nazar meñ ho

dil hai hamārā dil ki tumhārī nazar meñ hai

kahte haiñ jis ko dil mire pahlū meñ ab kahāñ

hai bhī to pā.emāl kisī rahguzar meñ hai

dekho to dekhte haiñ tumheñ kis nigāh se

hasrat hai jis kā naam hamārī nazar meñ hai

jis par paḌī pasīj gayā mom ho gayā

Duubī huī nigāh hamārī asar meñ hai

jachtā nahīñ nigāh meñ koī hasīñ bhī 'hijr'

jab se kisī kī chāñd sī sūrat nazar meñ hai

tum bhi nigah mein ho adu bhi nazar mein hai

duniya hamare dida-e-hasrat-nagar mein hai

han jaante hain jaan ka KHwahan tumhin ko hum

malum hai ki tegh tumhaari kamar mein hai

kya rashk hai ki ek ka hai ek muddai

tum dil mein ho to dard hamare jigar mein hai

go ghair ki baghal mein sahi wo pari-jamal

main to yahi kahunga ki meri nazar mein hai

donon ne dard-e-ishq ko taqsim kar liya

thoDa sa dil mein hai to zara sa jigar mein hai

main bhi hun aaj main ki bar aai murad-e-dil

dil bhi hai aaj dil ki wo mehman ghar mein hai

mamnun hun KHayal ka apne shab-e-firaq

jo samne nazar ke nahin wo nazar mein hai

dilbar ho ek tum ki hamari nazar mein ho

dil hai hamara dil ki tumhaari nazar mein hai

kahte hain jis ko dil mere pahlu mein ab kahan

hai bhi to paemal kisi rahguzar mein hai

dekho to dekhte hain tumhein kis nigah se

hasrat hai jis ka nam hamari nazar mein hai

jis par paDi pasij gaya mom ho gaya

Dubi hui nigah hamari asar mein hai

jachta nahin nigah mein koi hasin bhi 'hijr'

jab se kisi ki chand si surat nazar mein hai