tum aae ho tumhein bhi aazma kar dekh leta hun

tum aa.e ho tumheñ bhī aazmā kar dekh letā huuñ

tumhāre saath bhī kuchh duur jā kar dekh letā huuñ

havā.eñ jin kī andhī khiḌkiyoñ par sar paTaktī haiñ

maiñ un kamroñ meñ phir sham.eñ jalā kar dekh letā huuñ

ajab kyā is qarīne se koī sūrat nikal aa.e

tirī bātoñ ko ḳhvāboñ se milā kar dekh letā huuñ

sahar-dam kirchiyāñ TuuTe hue ḳhvāboñ kī miltī haiñ

to bistar jhaaḌ kar chādar haTā kar dekh letā huuñ

bahut dil ko dukhātā hai kabhī jab dard-e-mahjūrī

tirī yādoñ kī jānib muskurā kar dekh letā huuñ

uḌā kar rañg kuchh hoñToñ se kuchh āñkhoñ se kuchh dil se

ga.e lamhoñ ko tasvīreñ banā kar dekh letā huuñ

nahīñ ho tum bhī vo ab mujh se yaaro kyā chhupāoge

havā kī samt ko miTTī uḌā kar dekh letā huuñ

sunā hai be-niyāzī hī ilāj-e-nā-umīdī hai

ye nusḳha bhī koī din aazmā kar dekh letā huuñ

mohabbat mar ga.ī 'mushtāq' lekin tum na mānoge

maiñ ye afvāh bhī tum ko sunā kar dekh letā huuñ

tum aae ho tumhein bhi aazma kar dekh leta hun

tumhaare sath bhi kuchh dur ja kar dekh leta hun

hawaen jin ki andhi khiDkiyon par sar paTakti hain

main un kamron mein phir shamen jala kar dekh leta hun

ajab kya is qarine se koi surat nikal aae

teri baaton ko KHwabon se mila kar dekh leta hun

sahar-dam kirchiyan TuTe hue KHwabon ki milti hain

to bistar jhaD kar chadar haTa kar dekh leta hun

bahut dil ko dukhata hai kabhi jab dard-e-mahjuri

teri yaadon ki jaanib muskura kar dekh leta hun

uDa kar rang kuchh honTon se kuchh aankhon se kuchh dil se

gae lamhon ko taswiren bana kar dekh leta hun

nahin ho tum bhi wo ab mujh se yaro kya chhupaoge

hawa ki samt ko miTTi uDa kar dekh leta hun

suna hai be-niyazi hi ilaj-e-na-umidi hai

ye nusKHa bhi koi din aazma kar dekh leta hun

mohabbat mar gai 'mushtaq' lekin tum na manoge

main ye afwah bhi tum ko suna kar dekh leta hun