teri jabin pe meri subh ka sitara hai

tirī jabīñ pe mirī sub.h kā sitāra hai

tirā vajūd mirī zaat kā ujālā hai

harīf-e-partav-e-mahtāb hai jamāl tirā

kuchh aur lagtā hai dilkash jo duur hotā hai

mire yaqīn kī ma.asūmiyat ko mat Toko

mirī nigāh meñ har naqsh ik tamāshā hai

nazar to aa.e koī raah zindagānī kī

tamām ālam-e-imkāñ ġhubār-e-sahrā hai

na aarzū se khulā hai na justujū se khulā

ye husn-e-rāz jo har shai meñ kār-farmā hai

ġham-e-hayāt rahā hai hamārā gahvāra

ye ham se pūchh dil-e-dard āshnā kyā hai

charāġh le ke use DhūñDne chalā huuñ maiñ

jo āftāb kī mānind ik ujālā hai

jo ham ko bhuul ga.e un ko yaad kyuuñ kiije

tamām raat koī chupke chupke kahtā hai

kahāñ kahāñ liye phirtī hai zindagī ab tak

maiñ us jagah huuñ jahāñ dhuup hai na saaya hai

teri jabin pe meri subh ka sitara hai

tera wajud meri zat ka ujala hai

harif-e-partaw-e-mahtab hai jamal tera

kuchh aur lagta hai dilkash jo dur hota hai

mere yaqin ki masumiyat ko mat Toko

meri nigah mein har naqsh ek tamasha hai

nazar to aae koi rah zindagani ki

tamam aalam-e-imkan ghubar-e-sahra hai

na aarzu se khula hai na justuju se khula

ye husn-e-raaz jo har shai mein kar-farma hai

gham-e-hayat raha hai hamara gahwara

ye hum se puchh dil-e-dard aashna kya hai

charagh le ke use DhunDne chala hun main

jo aaftab ki manind ek ujala hai

jo hum ko bhul gae un ko yaad kyun kije

tamam raat koi chupke chupke kahta hai

kahan kahan liye phirti hai zindagi ab tak

main us jagah hun jahan dhup hai na saya hai