teri gali se guzarne ko sar jhukae hue

tirī galī se guzarne ko sar jhukā.e hue

faqīr hujra-e-haft-āsmāñ uThā.e hue

koī daraḳht sarā.e ki jis meñ jā baiTheñ

parinde apnī pareshāniyāñ bhulā.e hue

mire savāl vahī TūT-phūT kī zad meñ

javāb un ke vahī haiñ bane-banā.e hue

hameñ jo dekhte the jin ko dekhte the ham

vo ḳhvāb ḳhaak hue aur vo log saa.e hue

shikāriyoñ se mire ehtijāj meñ 'bābar'

daraḳht aaj bhī shāmil the haath uThā.e hue

teri gali se guzarne ko sar jhukae hue

faqir hujra-e-haft-asman uThae hue

koi daraKHt sarae ki jis mein ja baiThen

parinde apni pareshaniyan bhulae hue

mere sawal wahi TuT-phuT ki zad mein

jawab un ke wahi hain bane-banae hue

hamein jo dekhte the jin ko dekhte the hum

wo KHwab KHak hue aur wo log sae hue

shikariyon se mere ehtijaj mein 'babar'

daraKHt aaj bhi shamil the hath uThae hue