tera har raaz chhupae hue baiTha hai koi

terā har raaz chhupā.e hue baiThā hai koī

ḳhud ko dīvāna banā.e hue baiThā hai koī

sāqī-e-bazm ke maḳhsūs ishāroñ kī qasam

jaam hoñToñ se lagā.e hue baiThā hai koī

is numā.ish-gah-e-ālam meñ kamī hai ab tak

ashk āñkhoñ meñ chhupā.e hue baiThā hai koī

shab kī devī kā sukūt aur hī kuchh kahtā hai

phir bhī do sham.eñ jalā.e hue baiThā hai koī

merī ik ārzū-e-dīd kā e.ajāz na pūchh

muñh ko hāthoñ se chhupā.e hue baiThā hai koī

yaad bhī terī ik āzār-e-musalsal hai magar

apne siine se lagā.e hue baiThā hai koī

ham ko ma.alūm hai 'aḳhtar' ki hamārī ḳhātir

ek aalam ko bhulā.e hue baiThā hai koī

tera har raaz chhupae hue baiTha hai koi

KHud ko diwana banae hue baiTha hai koi

saqi-e-bazm ke maKHsus ishaaron ki qasam

jam honTon se lagae hue baiTha hai koi

is numaish-gah-e-alam mein kami hai ab tak

ashk aankhon mein chhupae hue baiTha hai koi

shab ki dewi ka sukut aur hi kuchh kahta hai

phir bhi do shamen jalae hue baiTha hai koi

meri ek aarzu-e-did ka eajaz na puchh

munh ko hathon se chhupae hue baiTha hai koi

yaad bhi teri ek aazar-e-musalsal hai magar

apne sine se lagae hue baiTha hai koi

hum ko malum hai 'aKHtar' ki hamari KHatir

ek aalam ko bhulae hue baiTha hai koi