jaDon mein sulagti hui har raat ka mausam

jāḌoñ meñ sulagtī huī har raat kā mausam

hai ḳhud se takallum kā savālāt kā mausam

har lamhe kī taqdīr huā kartī hai yaaro

socho to huā kartā hai har baat kā mausam

chhāñv bhī tirī dhuup bhī jo faisla de de

hai ab bhī tirī zad meñ mirī zaat kā mausam

bachchoñ kī tarah maañ ko bhī chalnā paḌā āḳhir

aayā hai shikārī ke liye ghaat kā mausam

lafzoñ ke shajar soch ke har phuul ko tarseñ

aur aage guzar jaa.e ḳhayālāt kā mausam

Duubā huā ghar dekh ke maiñ soch rahā huuñ

jazbāt kā mausam hai ki barsāt kā mausam

ho dīda-e-bīnā to nazar aa.e tumheñ bhī

ash'ār kī bastī meñ tilismāt kā mausam

jaDon mein sulagti hui har raat ka mausam

hai KHud se takallum ka sawalat ka mausam

har lamhe ki taqdir hua karti hai yaro

socho to hua karta hai har baat ka mausam

chhanw bhi teri dhup bhi jo faisla de de

hai ab bhi teri zad mein meri zat ka mausam

bachchon ki tarah man ko bhi chalna paDa aaKHir

aaya hai shikari ke liye ghat ka mausam

lafzon ke shajar soch ke har phul ko tarsen

aur aage guzar jae KHayalat ka mausam

Duba hua ghar dekh ke main soch raha hun

jazbaat ka mausam hai ki barsat ka mausam

ho dida-e-bina to nazar aae tumhein bhi

ash'ar ki basti mein tilismat ka mausam