tabiat rafta rafta KHugar-e-gham hoti jati hai

tabī'at rafta rafta ḳhūgar-e-ġham hotī jaatī hai

vahī ranj-o-alam haiñ par ḳhalish kam hotī jaatī hai

ḳhushī kā vaqt hai aur aañkh pur-nam hotī jaatī hai

khilī hai dhuup aur bārish bhī chham-chham hotī jaatī hai

ujālā 'ilm kā phailā to hai chāroñ taraf yaaro

basīrat aadmī kī kuchh magar kam hotī jaatī hai

kareñ sajda kisī but ko gavāra thā kise lekin

jabīñ ko kyā kareñ jo ḳhud-ba-ḳhud ḳham hotī jaatī hai

tujhe hai fikr merī mujh se baḌh kar ai mire maulā

mujhe darkār hai jo shai farāham hotī jaatī hai

uThī kyā ik nigāh-e-lutf phir apnī taraf yaaro

ki har TuuTī huī ummīd qaa.im hotī jaatī hai

baḌā ghāTe kā saudā hai 'sadā' ye saañs lenā bhī

baḌhe hai 'umr jyūñ-jyūñ zindagī kam hotī jaatī hai

tabi'at rafta rafta KHugar-e-gham hoti jati hai

wahi ranj-o-alam hain par KHalish kam hoti jati hai

KHushi ka waqt hai aur aankh pur-nam hoti jati hai

khili hai dhup aur barish bhi chham-chham hoti jati hai

ujala 'ilm ka phaila to hai chaaron taraf yaro

basirat aadmi ki kuchh magar kam hoti jati hai

karen sajda kisi but ko gawara tha kise lekin

jabin ko kya karen jo KHud-ba-KHud KHam hoti jati hai

tujhe hai fikr meri mujh se baDh kar ai mere maula

mujhe darkar hai jo shai faraham hoti jati hai

uThi kya ek nigah-e-lutf phir apni taraf yaro

ki har TuTi hui ummid qaim hoti jati hai

baDa ghaTe ka sauda hai 'sada' ye sans lena bhi

baDhe hai 'umr jyun-jyun zindagi kam hoti jati hai