tariKH ke safhat mein koi nahin ham-sar mera

tārīḳh ke safhāt meñ koī nahīñ ham-sar mirā

mahv-e-safar hai aaj tak pheñkā huā patthar mirā

har samt sehn-e-zāt meñ phaile hue saa.e mire

baiThā hai taḳht-e-fikr par simTā huā dilbar mirā

kyā ḳhush-nasībī hai mirī maiñ ek tanhā fauj huuñ

jhuuT aur sach kī jang meñ kaam aa gayā lashkar mirā

māhaul sab kā ek hai āñkheñ vahī nazreñ vahī

sab se alag rāheñ mirī sab se judā manzar mirā

ik rañg-e-istiġhrāq hai ik nik.hat-e-āvārgī

Thahrā huā gāgar meñ hai bahtā huā sāgar mirā

duniyā karegī ek din aurāq-gardānī mirī

yaad aa.egā ahbāb ko ganjīna-e-gauhar mirā

'kāvish' anā kī qaid ke dīvār-o-dar girne ko haiñ

ik ālam-e-asġhar meñ hai ik ālam-e-akbar mirā

tariKH ke safhat mein koi nahin ham-sar mera

mahw-e-safar hai aaj tak phenka hua patthar mera

har samt sehn-e-zat mein phaile hue sae mere

baiTha hai taKHt-e-fikr par simTa hua dilbar mera

kya KHush-nasibi hai meri main ek tanha fauj hun

jhuT aur sach ki jang mein kaam aa gaya lashkar mera

mahaul sab ka ek hai aankhen wahi nazren wahi

sab se alag rahen meri sab se juda manzar mera

ek rang-e-istighraq hai ek nikhat-e-awargi

Thahra hua gagar mein hai bahta hua sagar mera

duniya karegi ek din auraq-gardani meri

yaad aaega ahbab ko ganjina-e-gauhar mera

'kawish' ana ki qaid ke diwar-o-dar girne ko hain

ek aalam-e-asghar mein hai ek aalam-e-akbar mera