surahi ka bharam khulta na meri tishnagi hoti

surāhī kā bharam khultā na merī tishnagī hotī

zarā tum ne nigāh-e-nāz ko taklīf dī hotī

maqām-e-āshiqī duniyā ne samjhā hī nahīñ varna

jahāñ tak terā ġham hotā vahīñ tak zindagī hotī

tumhārī aarzū kyuuñ dil ke vīrāne meñ aa pahuñchī

bahāroñ meñ palī hotī sitāroñ meñ rahī hotī

zamāne kī shikāyat kyā zamāna kis kī suntā hai

magar tum ne to āvāz-e-junūñ pahchān lī hotī

ye sab rañgīniyāñ ḳhūn-e-tamannā se ibārat haiñ

shikast-e-dil na hotī to shikast-e-zindagī hotī

razā-e-dost 'qābil' merā me.ayār-e-mohabbat hai

unheñ bhī bhuul saktā thā agar un kī ḳhushī hotī

surahi ka bharam khulta na meri tishnagi hoti

zara tum ne nigah-e-naz ko taklif di hoti

maqam-e-ashiqi duniya ne samjha hi nahin warna

jahan tak tera gham hota wahin tak zindagi hoti

tumhaari aarzu kyun dil ke virane mein aa pahunchi

bahaaron mein pali hoti sitaron mein rahi hoti

zamane ki shikayat kya zamana kis ki sunta hai

magar tum ne to aawaz-e-junun pahchan li hoti

ye sab ranginiyan KHun-e-tamanna se ibarat hain

shikast-e-dil na hoti to shikast-e-zindagi hoti

raza-e-dost 'qabil' mera meayar-e-mohabbat hai

unhen bhi bhul sakta tha agar un ki KHushi hoti