silsila ab bhi KHwabon ka TuTa nahin

silsila ab bhī ḳhvāboñ kā TuuTā nahīñ

kuuch kar jaa.eñ kab kuchh bharosā nahīñ

haiñ fasīloñ se uljhe hue sar-phire

duur tak koī shahr-e-tamannā nahīñ

shaam se hī gharoñ meñ paḌīñ kunDiyāñ

chāñd is shahr meñ kyuuñ nikaltā nahīñ

aag lagne kī ḳhabreñ to pahuñchīñ magar

koī hairat nahīñ koī chauñkā nahīñ

chhīn kar mujh se le jaa.e merā badan

mo'tabar itnā koī añdherā nahīñ

kyā yahī milte rahne kā in.aam hai

ek khiḌkī nahīñ ik jharokā nahīñ

ek manzar meñ lipTe badan ke sivā

sard rātoñ meñ kuchh aur dikhtā nahīñ

tez ho jaa.eñ is kā to imkān hai

āñdhiyāñ ab rukeñ aisā lagtā nahīñ

silsila ab bhi KHwabon ka TuTa nahin

kuch kar jaen kab kuchh bharosa nahin

hain fasilon se uljhe hue sar-phire

dur tak koi shahr-e-tamanna nahin

sham se hi gharon mein paDin kunDiyan

chand is shahr mein kyun nikalta nahin

aag lagne ki KHabren to pahunchin magar

koi hairat nahin koi chaunka nahin

chhin kar mujh se le jae mera badan

mo'tabar itna koi andhera nahin

kya yahi milte rahne ka inam hai

ek khiDki nahin ek jharoka nahin

ek manzar mein lipTe badan ke siwa

sard raaton mein kuchh aur dikhta nahin

tez ho jaen is ka to imkan hai

aandhiyan ab ruken aisa lagta nahin