rakhta hai go qadim se buniyaad aagara

rakhtā hai go qadīm se buniyād āgara

akbar ke naam se huā ābād āgara

yaañ ke khañDar na aur jagah kī imārateñ

yaaro ajab maqām hai dil-shād āgara

shaddād zar lagā na banātā bahisht ko

gar jāntā ki hovegā ābād āgara

toḌe koī qile ko koī luuTe shahr ko

ab kis se apnī māñge bhalā daad āgara

ab to zarā sā gaañv hai beTī na de ise

lagtā thā varna chiin kā dāmād āgara

yak-bārgī to ab mujhe yā-rab tū phir basā

kartā hai ab ḳhudā se ye fariyād āgara

ik ḳhūb-rū nahīñ hai yahāñ varna ek din

thā rashk-e-husn-e-balaḳh-va-naushād āgara

hargiz vatan kī yaad na aave use kabhī

jo kar ke apnī jaañ ko kare shaad āgara

is meñ sadā ḳhushī se rahā hai tirā 'nazīr'

yā-rab hamesha rakhiyo to ābād āgara

rakhta hai go qadim se buniyaad aagara

akbar ke nam se hua aabaad aagara

yan ke khanDar na aur jagah ki imaraten

yaro ajab maqam hai dil-shad aagara

shaddad zar laga na banata bahisht ko

gar jaanta ki howega aabaad aagara

toDe koi qile ko koi luTe shahr ko

ab kis se apni mange bhala dad aagara

ab to zara sa ganw hai beTi na de ise

lagta tha warna chin ka damad aagara

yak-bargi to ab mujhe ya-rab tu phir basa

karta hai ab KHuda se ye fariyaad aagara

ek KHub-ru nahin hai yahan warna ek din

tha rashk-e-husn-e-balaKH-wa-naushad aagara

hargiz watan ki yaad na aawe use kabhi

jo kar ke apni jaan ko kare shad aagara

is mein sada KHushi se raha hai tera 'nazir'

ya-rab hamesha rakhiyo to aabaad aagara