sawad-e-sham na rang-e-sahar ko dekhte hain

savād-e-shām na rañg-e-sahar ko dekhte haiñ

bas ik sitāra-e-vahshat-asar ko dekhte haiñ

kisī ke aane kī jis se ḳhabar bhī aatī nahīñ

na jaane kab se usī rahguzar ko dekhte haiñ

ḳhudā-gavāh ki ā.īna-e-nafas hī meñ ham

ḳhud apnī zindagī-e-muḳhtasar ko dekhte haiñ

to kyā bas ek Thikānā vahī hai duniyā meñ

vo dar nahīñ to kisī aur dar ko dekhte haiñ

sunā hai shahr kā naqsha badal gayā 'mahfūz'

to chal ke ham bhī zarā apne ghar ko dekhte haiñ

sawad-e-sham na rang-e-sahar ko dekhte hain

bas ek sitara-e-wahshat-asar ko dekhte hain

kisi ke aane ki jis se KHabar bhi aati nahin

na jaane kab se usi rahguzar ko dekhte hain

KHuda-gawah ki aaina-e-nafas hi mein hum

KHud apni zindagi-e-muKHtasar ko dekhte hain

to kya bas ek Thikana wahi hai duniya mein

wo dar nahin to kisi aur dar ko dekhte hain

suna hai shahr ka naqsha badal gaya 'mahfuz'

to chal ke hum bhi zara apne ghar ko dekhte hain