utrin ajib raushniyan raat KHwab mein

utrīñ 'ajīb raushniyāñ raat ḳhvāb meñ

kyā kyā na 'aks tair rahe the sarāb meñ

kab se haiñ ek harf pe nazreñ jamī huī

vo paḌh rahā huuñ jo nahīñ likkhā kitāb meñ

paanī nahīñ ki apne hī chehre ko dekh luuñ

manzar zamīñ ke DhūñDtā huuñ māhtāb meñ

phir tīrgī ke ḳhvāb se chauñkā hai rāsta

phir raushnī sī dauḌ ga.ī hai sahāb meñ

kab tak rahegā ruuh pe pairāhan-e-badan

kab tak havā asiir rahegī habāb meñ

yuuñ ā.ina-ba-dast milī parbatoñ kī barf

sharmā ke dhuup lauT ga.ī āftāb meñ

jiine ke saath maut kā Dar hai lagā huā

ḳhushkī dikhā.ī dī hai samundar ko ḳhvāb meñ

guzrī hai baar baar mire sir se mauj-e-ḳhushk

ubhrā huuñ Duub Duub ke tasvīr-e-āb meñ

ik yaad hai ki chhīn rahī hai laboñ se jaam

ik 'aks hai ki kaañp rahā hai sharāb meñ

chūmā hai merā naam lab-e-surḳh ne 'shakeb'

yā phuul rakh diyā hai kisī ne kitāb meñ

utrin 'ajib raushniyan raat KHwab mein

kya kya na 'aks tair rahe the sarab mein

kab se hain ek harf pe nazren jami hui

wo paDh raha hun jo nahin likkha kitab mein

pani nahin ki apne hi chehre ko dekh lun

manzar zamin ke DhunDta hun mahtab mein

phir tirgi ke KHwab se chaunka hai rasta

phir raushni si dauD gai hai sahab mein

kab tak rahega ruh pe pairahan-e-badan

kab tak hawa asir rahegi habab mein

yun aaina-ba-dast mili parbaton ki barf

sharma ke dhup lauT gai aaftab mein

jine ke sath maut ka Dar hai laga hua

KHushki dikhai di hai samundar ko KHwab mein

guzri hai bar bar mere sir se mauj-e-KHushk

ubhra hun Dub Dub ke taswir-e-ab mein

ek yaad hai ki chhin rahi hai labon se jam

ek 'aks hai ki kanp raha hai sharab mein

chuma hai mera nam lab-e-surKH ne 'shakeb'

ya phul rakh diya hai kisi ne kitab mein