sauda-e-sarab de gaye hain

saudā-e-sarāb de gaye haiñ

kyā kuchh hameñ ḳhvāb de gaye haiñ

rūhoñ kī sapāT vus'atoñ ko

hairat ke sahāb de gaye haiñ

sochoñ kī udaas Tahniyoñ ko

zaḳhmoñ ke gulāb de gaye haiñ

sāñsoñ kī ḳhamosh naddiyoñ ko

maujoñ ke rubāb de gaye haiñ

jazbāt kī ḳhushk khetiyoñ ko

sailāb-e-'azāb de gaye haiñ

vīrān diloñ ke sāhiloñ ko

kyā kyā dur-e-nāb de gaye haiñ

qarnoñ ke ujaaḌ rāstoñ ko

lamhoñ ke shahāb de gaye haiñ

jhīloñ ke darāz dāmanoñ ko

'aksoñ kī kitāb de gaye haiñ

barsoñ ke thake musāfiroñ ko

'arsoñ kā nisāb de gaye haiñ

āhista-ḳhirām mausamoñ ko

shor-e-tab-o-tāb de gaye haiñ

kuchh chehre bikhartī jhurriyoñ ko

andoh-e-shabāb de gaye haiñ

achchhā hai vo ham ziyāñ-kashoñ ko

idrāk-e-hisāb de gaye haiñ

har aan na.e savāl 'tā.ib'

ā'sāb javāb de gaye haiñ

sauda-e-sarab de gaye hain

kya kuchh hamein KHwab de gaye hain

ruhon ki sapaT wus'aton ko

hairat ke sahab de gaye hain

sochon ki udas Tahniyon ko

zaKHmon ke gulab de gaye hain

sanson ki KHamosh naddiyon ko

maujon ke rubab de gaye hain

jazbaat ki KHushk khetiyon ko

sailab-e-'azab de gaye hain

viran dilon ke sahilon ko

kya kya dur-e-nab de gaye hain

qarnon ke ujaD raston ko

lamhon ke shahab de gaye hain

jhilon ke daraaz damanon ko

'akson ki kitab de gaye hain

barson ke thake musafiron ko

'arson ka nisab de gaye hain

aahista-KHiram mausamon ko

shor-e-tab-o-tab de gaye hain

kuchh chehre bikharti jhurriyon ko

andoh-e-shabab de gaye hain

achchha hai wo hum ziyan-kashon ko

idrak-e-hisab de gaye hain

har aan nae sawal 'taib'

aa'sab jawab de gaye hain