samay se pahle bhale sham-e-zindagi aae

samay se pahle bhale shām-e-zindagī aa.e

kisī tarah bhī udāsī kā ghaav bhar jaa.e

ham ab udaas nahīñ sar-ba-sar udāsī haiñ

hameñ charāġh nahīñ raushnī kahā jaa.e

jo sher samjhe mujhe dād-vād detā rahe

gale lagā.e jise ġham samajh meñ aa jaa.e

ga.e dinoñ meñ koī shauq thā mohabbat kā

ab is azaab meñ ye zehn kaun uljhā.e

kisī ke hañsne se raushan huī thī bād-e-sabā

koī udaas huā to gulāb murjhā.e

ye ek dukh hī dabā rah gayā hai āñkhoñ meñ

vo ek misrā jise sher kar nahīñ paa.e

agar huuñ ġhusse meñ phir bhī maiñ chāhtā ye huuñ

maiñ sirf hijr kahūñ aur phone kaT jaa.e

samay se pahle bhale sham-e-zindagi aae

kisi tarah bhi udasi ka ghaw bhar jae

hum ab udas nahin sar-ba-sar udasi hain

hamein charagh nahin raushni kaha jae

jo sher samjhe mujhe dad-wad deta rahe

gale lagae jise gham samajh mein aa jae

gae dinon mein koi shauq tha mohabbat ka

ab is azab mein ye zehn kaun uljhae

kisi ke hansne se raushan hui thi baad-e-saba

koi udas hua to gulab murjhae

ye ek dukh hi daba rah gaya hai aankhon mein

wo ek misra jise sher kar nahin pae

agar hun ghusse mein phir bhi main chahta ye hun

main sirf hijr kahun aur phone kaT jae