salib o dar ke qisse raqam hote hi rahte hain

salīb o daar ke qisse raqam hote hī rahte haiñ

qalam kī jumbihsoñ par sar qalam hote hī rahte haiñ

ye shāḳh-e-gul hai ā.īn-e-numū se aap vāqif haiñ

samajhtī hai ki mausam ke sitam hote hī rahte haiñ

kabhī terī kabhī dast-e-junūñ kī baat chaltī hai

ye afsāne to zulf-e-ḳham-ba-ḳham hote hī rahte haiñ

tavajjoh un kī ab ai sākinān-e-shahr tum par hai

ham aisoñ par bahut un ke karam hote hī rahte haiñ

tire band-e-qabā se rishta-e-anfās-e-daurāñ tak

kuchh uqde nāḳhunoñ ko bhī baham hote hī rahte haiñ

hujūm-e-lāla-o-nasrīñ ho yā lab-hā-e-shīrīñ hoñ

mirī mauj-e-nafas se tāza-dam hote hī rahte haiñ

mirā chāk-e-girebāñ chāk-e-dil se milne vaalā hai

magar ye hādse bhī besh o kam hote hī rahte haiñ

salib o dar ke qisse raqam hote hi rahte hain

qalam ki jumbihson par sar qalam hote hi rahte hain

ye shaKH-e-gul hai aain-e-numu se aap waqif hain

samajhti hai ki mausam ke sitam hote hi rahte hain

kabhi teri kabhi dast-e-junun ki baat chalti hai

ye afsane to zulf-e-KHam-ba-KHam hote hi rahte hain

tawajjoh un ki ab ai sakinan-e-shahr tum par hai

hum aison par bahut un ke karam hote hi rahte hain

tere band-e-qaba se rishta-e-anfas-e-dauran tak

kuchh uqde naKHunon ko bhi baham hote hi rahte hain

hujum-e-lala-o-nasrin ho ya lab-ha-e-shirin hon

meri mauj-e-nafas se taza-dam hote hi rahte hain

mera chaak-e-gireban chaak-e-dil se milne wala hai

magar ye hadse bhi besh o kam hote hi rahte hain