mujhe banaya gaya aur phir bachi miTTi

mujhe banāyā gayā aur phir bachī miTTī

to iztirāb banā dī ga.ī vahī miTTī

tumhāre shahr kī jānib hī jaane lagtī hai

havā ke saath mirī qabr se uḌī miTTī

tamām 'umr safar meñ hī kaT ga.ī apnī

tamām 'umr na kapḌoñ se jhaḌ sakī miTTī

lo phir se aa ga.ī haa.e hamārī sāl-girah

lo phir hayāt kī dīvār se chhuTī miTTī

kisī nigāh kī jādū-garī se bikhrī hai

yaqīn maano baḌī saḳht thī mirī miTTī

vo sab nasīb ke sahrā meñ ġharq-e-āb hue

jinhoñ ne bar-sar-e-dariyā uḌaa.ī thī miTTī

tumhārā khel nimaT hī chukā hai 'kāshif-beg’

sabhī ne tiin daf'a tum pe Daal dī miTTī

mujhe banaya gaya aur phir bachi miTTi

to iztirab bana di gai wahi miTTi

tumhaare shahr ki jaanib hi jaane lagti hai

hawa ke sath meri qabr se uDi miTTi

tamam 'umr safar mein hi kaT gai apni

tamam 'umr na kapDon se jhaD saki miTTi

lo phir se aa gai hae hamari sal-girah

lo phir hayat ki diwar se chhuTi miTTi

kisi nigah ki jadu-gari se bikhri hai

yaqin mano baDi saKHt thi meri miTTi

wo sab nasib ke sahra mein gharq-e-ab hue

jinhon ne bar-sar-e-dariya uDai thi miTTi

tumhaara khel nimaT hi chuka hai 'kashif-beg’

sabhi ne tin daf'a tum pe Dal di miTTi