isi liye main kinara-kashi nahin karta

isī liye maiñ kināra-kashī nahīñ kartā

vo dil kī qaid se sab ko barī nahīñ kartā

judā safar hai so rasta judā banāyā hai

maiñ andhā-dhund kabhī pairvī nahīñ kartā

tumhārī raa.e kā iz.hār-o-ehtirām durust

suḳhan to kartā huuñ maiñ naukrī nahīñ kartā

kisī tarah bhī zamāna-shanās hotā nahīñ

tire faqīr se jo dil-lagī nahīñ kartā

sabhī ko rizq-e-suḳhan kī nahīñ farāvānī

sabhī pe nazr-e-karam vo saḳhī nahīñ kartā

vo aur din the tirī yaad meñ paḌe rahnā

maiñ aaj kal to tirī baat hī nahīñ kartā

kisī ke hukm pe gūñdhā hai jism varna 'razā'

maiñ apne shauq se kūza-garī nahīñ kartā

isi liye main kinara-kashi nahin karta

wo dil ki qaid se sab ko bari nahin karta

juda safar hai so rasta juda banaya hai

main andha-dhund kabhi pairwi nahin karta

tumhaari rae ka izhaar-o-ehtiram durust

suKHan to karta hun main naukri nahin karta

kisi tarah bhi zamana-shanas hota nahin

tere faqir se jo dil-lagi nahin karta

sabhi ko rizq-e-suKHan ki nahin farawani

sabhi pe nazr-e-karam wo saKHi nahin karta

wo aur din the teri yaad mein paDe rahna

main aaj kal to teri baat hi nahin karta

kisi ke hukm pe gundha hai jism warna 'raza'

main apne shauq se kuza-gari nahin karta